विश्वमा भएका ख्रीष्टिय मण्डलीहरूका आराधना सभा संचालन शैलीहरू फरक फरक रहेको पाइन्छ। कतिपया मण्डलीहरूमा संगीत समूहद्वारा भजन तथा गीतहरू गाउने कार्यहरूमा लामो समय लिएको पाइन्छ। त्यसपछि सूचना तथा जानकारीहरू गराउने गरिएको पाइन्छ। अन्तमा प्रवचन दिने गरिएको पाइन्छ। प्रवचन समय अत्यन्तै छोटो दिइएको पाइन्छ। कतिपया मण्डलीहरूमा भजन गाउने कार्यलाई अत्यन्तै छोटो समय दिइएको तर प्रवचनलाई लामो समय दिइएको देखिन्छ। कतिपया मण्डलीहरूमा रीतिविधिहरूलाई बढावा दिइएको देखिन्छ। प्रार्थनाहरू हृदयबाट अभिव्यक्त नगरी प्रकाशित पुस्तकबाट पढ्ने, मैनवत्ती वाल्ने, क्रूसलाई ढोग्ने लगायतका अबाइबलीया रीतिविधिहरू गरिरहेको पाइन्छ। शिक्षामा पनि विभिधता पाइन्छ। पवित्र शास्त्र बाइबलमा शिक्षामा स्थिर भई अगमवक्ताहरू, प्रेरितहरूद्वारा प्रकाशित परमेश्वरका सत्यतामा रहेर सिकाउनुपर्ने तथ्य स्पष्ट गरी उल्लेख भएका छन्। साथै मण्डली सभा शैली, विधि संबन्धमा कतिपया तथ्यहरू बाइबलमा स्पष्ट रूपमा उल्लेख गरिएका छन्। पावल प्रेरितले १ कोरिन्थी १४:२६ मा मण्डली भेला हुँदा गरिनुपर्ने कार्यहरू र उद्देश्य उल्लेख गरेका छन्, “जब तिमीहरू भेला हुन्छौ, तब तिमीहरूमध्ये हरेकसंग भजन हुन्छ, शिक्षा हुन्छ, भाषा हुन्छ, प्रकाश हुन्छ, अनुवाद हुन्छ। सबै कुराहरू उन्नतिका निम्ति नै गरिऊन्।” प्रेरितहरूको शेषपछि कतिपया वरदानहरूको अन्त भएको थियो जसमध्ये विश्वास नगर्नेहरूका निम्ति परमेश्वरबाट चिन्ह स्वरूप दिइएको वरदान अन्यभाषा एक हो (१ कोरिन्थी १४:२२)।

जीवन एक यात्रा हो। प्रस्थान विन्दु एक हुन्छ भने यात्रा गन्तव्य अर्को हुन्छ। धर्तीको एक छेउबाट प्रारम्भ भएको यात्रा कुनै स्थानमा टुंगिन्छ। त्यसविच अनेक आरोह-अवरोहरू हुन्छन्, अनेक चुनौति र संघर्षहरू हुन्छन्। तर जीवन लक्ष महत्वपूर्ण हुन्छ। सही लक्षले सहि गन्तव्यमा पुर्‍याउँदछ। लक्षविहिन यात्राले टुंगोमा पुर्‍याउँदैन। अब्राहामले परमेश्वरको बोलावट पाएपछि आफ्नो देश र आफ्ना घरानालाई छोडि परमेश्वरबाट प्राप्त प्रतिज्ञाको देशलाई गन्तव्य बनाई यात्रा प्रारम्भ गरे। उनी हारानमा बस्नु अघि मेसोपोटामियामै हुँदा अर्थात् मेसोपोटामियाको ऊर शहरमा हुँदा महिमाका परमेश्वर देखापर्नुभई भन्नुभएको थियो, “तिमी आफ्नो देशबाट र आफ्ना साखासन्तानहरूको बीचबाट निस्क र त्यस देशमा आऊ, जुन देश म तिमीलाई देखाउनेछु।” तर उनी केही समय हारानमा अल्झिए। यात्रा गन्तव्य मानिसले कहिले काहिँ भुल्न सक्दछ। विविध परिस्थिति र परिवेशद्वारा मानिस अल्झनमा पर्न सक्दछ। अब्राहाम अल्झनमा परेको देखिन्छ। उनलाई ऊरबाट आफू र आफ्ना पत्नी सारा मात्र निस्कन भनिएको थियो तर साथमा उनका बुबा तेरह र भतिज लूतका साथै बुबा पनि थिए। हारानमा उनका बुबा तेरहको मृत्युपछि प्रतिज्ञाको देशमा जान उनलाई हारानमा पुनः परमेश्वरले भन्नुपरेको थियो, “आफ्नो देश, आफ्नो कुटुम्ब र आफ्ना बुबाको घरबाट निस्केर त्यस देशमा जाऊ, जो म तिमीलाई देखाउनेछु!” त्यहाँबाट उनी प्रतिज्ञाको देशतर्फ त गए तर उनका साथमा भतिज लूत पनि थिए। प्रतिज्ञाको देश कनान आइपुगेपछि परमेश्वरले अब्राहामलाई संक्षिप्त रूपमा भन्नुभयो, “यो देश म तिम्रो वंशलाई दिनेछु।” उनले प्रतिज्ञाको देशमा परमप्रभुका निम्ति एक वेदी बनाए र उहाँलाई धन्यवाद दिए। तर केही समयमै प्रतिज्ञाको देशमा घोर अनिकाल पर्‍यो। तब अब्राहाम आफ्नी पत्नी सारा र लूतलाई लिई मिस्रमा बसोबास गर्न गए। यो उनको जीवनको एक ठूलो अल्झन थियो। मिस्रमा उनलाई आर्थिक लाभ त भए तर उनले निकै महत्वपूर्ण कुराहरू गुमाए। मिस्र देशका कारण उनले जीवनमा अनेकौं जटिलताहरू पनि व्यहोरेका थिए। अन्ततः उनी प्रतिज्ञाको देश फर्के। लूत र उनी विच संबन्धहरूमा समस्याहरू वृद्धि भए। उनीहरू एकापसमा छुट्टिए। लूतले परमप्रभुको बगैंचा अनि मिस्र जस्तो देखिने सदोम र गमोरालाई रोजे जहाँ उनले नोक्सानी र विनाश भोग्यो। लूत अलग्गिएपछि मात्रै परमेश्वर अब्राहामसंग प्रतिज्ञाको देश संबन्धमा विस्तृत रूपमा बोल्नुभयो र प्रतिज्ञालाई स्पष्ट पार्नुभयो। अब्राहामलाई दिइएको उक्त देशमा आज पनि उनकै सन्तान इस्रायल सामर्थ्यसाथ बसिरहेका छन्। यही प्रतिज्ञाको देशमा नै मसिह आउनुभयो जसद्वारा “तिमीमा पृथ्वीका सबै कुलहरू आशिषित हुनेछन्” भनी अब्राहामसंग गरिएको प्रतिज्ञा पूरा भयो। यसरी अब्राहाम आफ्नो जीवन यात्राको टुंगोमा पुग्न सफल बने जुन हाम्रो जीवन यात्राको निम्ति एक सुन्दर नमूना हो।

आज विश्वभर ख्रीष्टमस चाड ख्रीष्टको जन्मोत्सवको रूपमा परिचित छ। के ख्रीष्टको जन्मदिन यकिन भएको छ? उहाँ कुन दिन जन्मनुभयो? यसबारे के बाइबलले स्पष्ट रूपमा उल्लेख गरेको छ? के ख्रीष्ट र ख्रीष्टमस विचमा कुनै तादात्म्यता छ? के ख्रीष्टले ख्रीष्टमस मनाउनुभयो? के उहाँले आफ्ना चेलाहरूलाई ख्रीष्टमस मनाउन आज्ञा दिनुभएको थियो? यी सबै प्रश्नहरू अनुत्तरित रहेका छन्। उहाँको जन्मदिन यकिन गरिएको छैन। न येशूले ख्रीष्टमस मनाउनुभयो न उहाँले ख्रीष्टमस मनाउन चेलाहरूलाई कुनै आज्ञा वा निर्देशन नै दिनुभयो। बाइबलमा कसैले पनि ख्रीष्टमस मनाएको विवरण छैन। ख्रीष्टको जन्म दिन अज्ञात रहेको छ। ख्रीष्टको जन्मको सबैभन्दा विस्तृत विवरण लूका २:१-८ मा दिइएको छ। यहाँ उल्लेख गरिएको छ कि येशूको जन्मको समयमा जनगणना लिने कार्य भइरहेको थियो। लेखिएको छ, “अनि त्यही इलाकामा राती आफ्नो बगालको हेरचाह गर्दै बारीमा बसिरहेका गोठालाहरू थिए।” इस्रायलमा जाडो समयमा झरी पर्ने र जाडो हुने गर्दछ। त्यस्तो समयमा जनगणना गरिनु चुनौतिपूर्ण हुन्छ। जाडो मौसममा गोठालाहरू राती खुला मैदानमा बस्दैनन्। यी विविध कारणहरूले गर्दा येशूको जन्म जाडो मौसममा भएको कुरामा आशंका रहेको छ। मूल कुरा त ख्रीष्टको जन्म डिसेम्वर २५ मा भएको यकिन भएकै छैन। परमेश्वरले येशूको जन्म दिनलाई अज्ञात राख्न चाहानुभयो। मानिसमा स्वाभाविक रूपमा देखिने कुरालाई वा तोकिएको दिनलाई बढवा दिने प्रवृत्तिको रहेको छ। उहाँको जन्म दिन अज्ञात रहँदा त आज त्यति भव्यताका साथ ख्रीष्टमस मनाउँछन् भने दिनै तोकिदा ख्रीष्टको जन्मोत्सव कुन प्रकृतिको हुन्थ्यो होला। मोशाको शवलाई परमेश्वरले अज्ञात स्थानमा दफन गर्नुभयो। तर यसमा शैतानले विवाद गरेका थिए (यहूदा ९)। उनी चाहान्थे कि देखिने स्थानमा दफन हुनुपर्दछ। यदि मोशाको शव देखिने स्थानमा दफन गरिएको भए उक्त स्थानलाई निश्चय तिर्थस्थल वा धार्मिक स्थल बनाई मूर्तिपूजामा परिणत गरिनेथियो।